កិច្ចសន្ទនាថ្នាក់តំបន់ស្ដីពីហិរញ្ញប្បទានអាកាសធាតុសហគមន៍សម្រាប់ភាពធន់តំបន់អាស៊ីប៉ាស៊ីហ្វិក

 

សាលប្រជុំលេខាធិការដ្ឋាន គ.ជ.អ.ប. ៖ ថ្ងៃអង្គារ ៣កើត ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៦ ខែសីហា ឆ្នាំ២០២៥ ឯកឧត្តម ឆេង វឌ្ឍនៈ អនុប្រធានលេខាធិការដ្ឋាន គ.ជ.អ.ប. តំណាងខ្ពង់ខ្ពស់ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប. បានអញ្ជើញចូលរួមកិច្ចសន្ទនាថ្នាក់តំបន់ស្ដីពីហិរញ្ញប្បទានអាកាសធាតុសហគមន៍សម្រាប់ភាពធន់តំបន់អាស៊ីប៉ាស៊ីហ្វិក រយៈពេល ០៣ថ្ងៃ ចាប់ទីថ្ងៃទី២៦ ដល់ថ្ងៃទី២៨ ខែសីហា ឆ្នាំ២០២៥ តាមរយៈប្រព័ន្ធបញ្ជូនរូបភាព និងសំឡេងពីចម្ងាយ។ ឯកឧត្តម បានអញ្ជើញចូលរួមជាវាគ្មិនក្នុងវគ្គទី១២នៃកិច្ចសន្ទនាស្ដីពីការផ្តល់ហិរញ្ញប្បទានអាកាសធាតុសម្រាប់ការបន្ស៊ាំទៅនឹងការប្រែប្រួលអាកាសធាតុនៅមូលដ្ឋាន។

កិច្ចសន្ទនានេះរៀបចំឡើងដោយអង្គការ UNDP និងអង្គការ UNCDF ក្នុងគោលបំណងដើម្បី៖ 

(១)ពង្រឹងតួនាទីនៃកម្មវិធីអភិវឌ្ឍន៍សហប្រជាជាតិ (UNDP) ក្នុងវិស័យហិរញ្ញប្បទានអាកាសធាតុ តាមរយៈការបង្ហាញអំពីការអនុវត្តនៅកម្រិតថ្នាក់ជាតិ និងមូលដ្ឋានដែលមានប្រសិទ្ធភាព ទិន្នន័យជាក់ស្តែង និងគំរូនៃការគ្រប់គ្រង ដើម្បីធានាឱ្យមានការទទួលខុសត្រូវ និងប្រសិទ្ធភាពខ្ពស់ជាងមុន 

(២)ពន្លឿនការអនុវត្ត NDC និង NAP តាមរយៈការស្វែងរកនូវប្រភពហិរញ្ញប្បទានថ្មីដែលស្របតាមការផ្លាស់ប្តូរអាទិភាពក្នុងតំបន់ និងសក្ដានុពលសកល 

(៣)លើកកម្ពស់គំរូការដាក់បញ្ចូលហិរញ្ញប្បទាន ដោយកំណត់នូវគោលនយោបាយ យន្តការ និងឧបករណ៍ច្នៃប្រឌិតដែលអាចពង្រីកលទ្ធភាពទទួលបានការគាំទ្រហិរញ្ញប្បទានសម្រាប់ក្រុមងាយរងគ្រោះ និងអាចប្រើប្រាស់យន្តការប្រភពហិរញ្ញប្បទានជំនួស និង 

(៤)បង្កើនកិច្ចសហប្រតិបត្តិការ តាមរយៈការរៀនសូត្រពីគ្នាទៅវិញទៅមក ការបង្កើតរួមគ្នា និងភាពជាដៃគូថ្នាក់តំបន់ ដើម្បីពង្រីកដំណោះស្រាយហិរញ្ញប្បទានអាកាសធាតុឱ្យបានទូលំទូលាយ៕ 

(ប្រពភព័ត៌មានពីលេខាធិការដ្ឋាន គ.ជ.អ.ប.)