ឯកឧត្តម នេត្រ ភក្ត្រា ដឹកនាំកិច្ចប្រជុំត្រៀមរៀបចំសន្និបាតបូកសរុបលទ្ធផលការងារព័ត៌មាន និងសោតទស្សន៍ឆ្នាំ២០២៦ និងសន្និសីទពហុភាគីពាក់ព័ន្ធរបស់អាស៊ាន

 ភ្នំពេញ៖ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានអញ្ជើញដឹកនាំកិច្ចប្រជុំស្តីពីការត្រៀមលក្ខណៈរៀបចំសន្និបាតបូកសរុបលទ្ធផលការងារព័ត៌មាន និងសោតទស្សន៍ឆ្នាំ២០២៦ និងលើកទិសដៅការងារសម្រាប់ឆ្នាំ២០២៧ ព្រមទាំងការត្រៀមលក្ខណៈរៀបចំសន្និសីទពហុភាគីពាក់ព័ន្ធរបស់អាស៊ាន ស្តីពីការប្រឆាំងព័ត៌មានក្លែងក្លាយ និងការគ្រប់គ្រងព័ត៌មានសំយោគក្នុងយុគសម័យឌីជីថល។

កិច្ចប្រជុំនេះ រៀបចំឡើងក្នុងគោលបំណងពិនិត្យ និងជំរុញការងារត្រៀមលក្ខណៈឱ្យបានគ្រប់ជ្រុងជ្រោយ សម្រាប់ការរៀបចំសន្និបាតបូកសរុបលទ្ធផលការងារព័ត៌មាន និងសោតទស្សន៍ឆ្នាំ២០២៦ ព្រមទាំងកំណត់ទិសដៅ និងអាទិភាពការងារសម្រាប់ឆ្នាំ២០២៧ ឱ្យស្របតាមបរិបទនៃការវិវត្តយ៉ាងឆាប់រហ័សនៃបច្ចេកវិទ្យាឌីជីថល និងប្រព័ន្ធផ្សព្វផ្សាយទំនើប។

ជាមួយគ្នានេះ កិច្ចប្រជុំក៏បានផ្តោតលើការត្រៀមរៀបចំសន្និសីទពហុភាគីពាក់ព័ន្ធរបស់អាស៊ាន ស្តីពីការប្រឆាំងព័ត៌មានក្លែងក្លាយ និងការគ្រប់គ្រងព័ត៌មានសំយោគក្នុងយុគសម័យឌីជីថល ដែលជាវេទិកាសម្រាប់ការចែករំលែកបទពិសោធន៍ ចំណេះដឹង និងការអនុវត្តល្អៗរវាងបណ្តាប្រទេសពាក់ព័ន្ធ ក្នុងការឆ្លើយតបចំពោះបញ្ហាប្រឈមថ្មីៗក្នុងវិស័យព័ត៌មាន និងសារព័ត៌មាន។

ក្នុងឱកាសនេះ ឯកឧត្តមរដ្ឋមន្ត្រី នេត្រ ភក្ត្រា បានណែនាំឱ្យអង្គភាពពាក់ព័ន្ធបន្តពង្រឹងកិច្ចសហការគ្នា និងរៀបចំផែនការការងារឱ្យបានច្បាស់លាស់ ស្របតាមតួនាទី និងភារកិច្ចរបស់ខ្លួន ដើម្បីធានាឱ្យការរៀបចំព្រឹត្តិការណ៍ទាំងពីរប្រព្រឹត្តទៅដោយរលូន មានប្រសិទ្ធភាព និងសម្រេចបានលទ្ធផលល្អប្រសើរ។

ការត្រៀមរៀបចំសន្និបាត និងសន្និសីទទាំងនេះ ក៏ត្រូវបានចាត់ទុកថាជាផ្នែកសំខាន់មួយក្នុងការពង្រឹងគុណភាពការងារព័ត៌មាន និងសោតទស្សន៍ ការលើកកម្ពស់ការទទួលបានព័ត៌មានដែលមានភាពត្រឹមត្រូវ និងគួរឱ្យទុកចិត្ត ព្រមទាំងការឆ្លើយតបប្រកបដោយប្រសិទ្ធភាពចំពោះបញ្ហាព័ត៌មានក្លែងក្លាយ និងព័ត៌មានសំយោគ ដែលកំពុងក្លាយជាបញ្ហាប្រឈមសំខាន់ក្នុងសម័យឌីជីថល។