វគ្គបណ្តុះបណ្តាលស្តីពីរបៀបប្រើប្រាស់ថ្នាលឌីជីថល និងកម្មវិធីរាជរដ្ឋាភិបាលឌីជីថល

 

ក្រសួងមហាផ្ទៃ៖ ថ្ងៃអង្គារ ១០រោច ខែស្រាពណ៍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៩ ខែសីហា ឆ្នាំ២០២៥ លេខាធិការដ្ឋាន គ.ជ.អ.ប. សហការជាមួយអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថលក្នុងការរៀបចំនូវវគ្គបណ្តុះបណ្តាលមួយពី៖ “របៀបប្រើប្រាស់ថ្នាលឌីជីថល និងកម្មវិធីរាជរដ្ឋាភិបាលឌីជីថល” ក្រោមអធិបតីភាព ឯកឧត្តម ម៉ាអុន ម៉ាអូណាត អនុប្រធានលេខាធិការដ្ឋាន គ.ជ.អ.ប. តំណាងឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប.។

វគ្គបណ្តុះបណ្តាលដ៏មានសារៈសំខាន់នេះ ត្រូវបានរៀបចំឡើងក្នុងគោលបំណងដើម្បីលើកកម្ពស់ចំណេះដឹងផ្នែកឌីជីថល និងស្វែងយល់ស៊ីជម្រៅពីមុខងារ និងសារៈសំខាន់នៃថ្នាលឌីជីថល រួមមាន៖ ១, ថ្នាលផ្ទុកឯកសារសាធារណៈផ្លូវការ GO.GOV.KH  ២,ថ្នាលបង្កើតទម្រង់បែបបទអនឡាញ FORM.GOV.KH ៣,ថ្នាលបញ្ជូនសារពហុទិសដៅ NOMSA.GOV.Kh ៤, ថ្នាលផ្ទៀងផ្ទាត់ឯកសារ VERIFY.GOV.KH ៥,កម្មវិធីបញ្ញាសិប្បនិម្មិតបំប្លែងអត្ថបទទៅជាសំឡេងសារិកា (SARIKA)។

ឆ្លៀតក្នុងឱកាសនេះ ឯកឧត្តម ម៉ាអុន ម៉ាអូណាត អនុប្រធានលេខាធិការដ្ឋាន គ.ជ.អ.ប. បានគូសបញ្ជាក់ថា រាជរដ្ឋាភិបាលកម្ពុជា បានកំណត់ចក្ខុវិស័យក្នុងការប្រែក្លាយកម្ពុជាឲ្យក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលកម្រិតខ្ពស់នៅឆ្នាំ២០៥០។ ដើម្បីសម្រេចបាននូវចក្ខុវិស័យជាយុទ្ធសាស្ត្រនេះលើផ្នែកឌីជីថល រាជរដ្ឋាភិបាលបានដាក់ចេញនូវក្របខ័ណ្ឌយុទ្ធសាស្ត្រដូចជាក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា (២០២១-២០៣៥) និងគោលនយោបាយរដ្ឋាភិបាលឌីជីថលកម្ពុជា (២០២២-២០៣៥)។ គោលនយោបាយទាំងនេះសង្កត់ធ្ងន់លើការធ្វើសមាហរណកម្មនៃបច្ចេកវិទ្យាព័ត៌មាន និងទំនាក់ទំនង (ICT) លើវិស័យផ្សេងៗ ក្នុងគោលបំណងកសាងរដ្ឋាភិបាលឌីជីថលដែលមានសមត្ថភាពលើកកម្ពស់គុណភាពការរស់នៅរបស់ប្រជាពលរដ្ឋ ជំរុញកំណើនសេដ្ឋកិច្ច និងលើកកម្ពស់ការទទួលសេវាសាធារណៈប្រកបដោយ  បរិយាបន្ន តម្លាភាព និងប្រសិទ្ធភាព និងបានកំណត់អាទិភាពនៃការធ្វើបរិវត្តកម្មឌីជីថលក្នុងវិស័យសាធារណៈសំខាន់ៗ រួមមាន រដ្ឋបាលសាធារណៈ សុខាភិបាល ការអប់រំ និងការផ្តល់សេវា ដោយធានាថា ICT ក្លាយជាឆ្អឹងខ្នងនៃការអភិវឌ្ឍន៍សេដ្ឋកិច្ច និងសង្គម។ ដូច្នេះ ការរៀបចំនូវវគ្គបណ្តុះបណ្តាលដ៏មានសារៈសំខាន់នេះឡើងពិតជាផ្នែកមួយក្នុងការរួមចំណែកជាមួយរាជរដ្ឋាភិបាលកម្ពុជាដើម្បីសម្រេចបាននូវចក្ខុវិស័យខាងលើ។

បន្ថែមពីនេះ ឯកឧត្តមប្រធាន ក៏បានស្នើ និងលើកទឹកចិត្តដល់ដល់អង្គភាពពាក់ព័ន្ធនានាបន្តគាំទ្រ និងចូលរួមអនុវត្តកំណែទម្រង់វិមជ្ឈការ និងវិសហមជ្ឈការ និងកំណែទម្រង់ផ្សេងៗទៀត ក៏ដូចជាការធ្វើទំនើបកម្មឌីជីថលទាំងថ្នាក់ជាតិ និងថ្នាក់ក្រោមជាតិឱ្យកាន់តែសកម្មបន្ថែមទៀត ដើម្បីលើកកម្ពស់ការប្រើប្រាស់ថ្នាលឌីជីថល ជាពិសេសថ្នាលទាំង៥ខាងលើ ដែលបានអភិវឌ្ឍដោយគណៈកម្មាធិការរដ្ឋាភិបាលឌីជីថល និងចូលរួមអនុវត្តបរិវត្តកម្មឌីជីថលរបស់រាជរដ្ឋាភិបាល ជាពិសេសអាទិភាព “បច្ចេកវិទ្យា” នៃយុទ្ធសាស្ត្របញ្ចកោណដំណាក់កាលទី១របស់រាជដ្ឋាភិបាលនីតិកាលទី៧ នៃរដ្ឋសភា។

វគ្គបណ្តុះបណ្តាលនេះមានការចូលរួមពីឯកឧត្តម លោក លោកស្រីជាប្រធានអង្គភាពអង្គភាព អនុប្រធានអង្គភាពអង្គភាពនៃលេខាធិការដ្ឋាន គ.ជ.អ.ប. អនុប្រធាននាយកដ្ឋានបរិវត្តកម្មរដ្ឋាភិបាលឌីជីថល បុគ្គលិក មន្ត្រី និងទីប្រឹក្សានៃលេខាធិការដ្ឋាន គ.ជ.អ.ប. សរុបចំនួន ៣៨រូប ស្រី ៨រូប។

ប្រភពព័ត៌មាន ក្រសួងមហាផ្ទៃ

#007

/ Facebook Page៖
https://www.facebook.com/share/12GyV1ispz2/
/គ្រុបព៍ត៌មាន- Channel News ៖
https://t.me/kpostnews
/គ្រុមព៍ត៌មានទាន់ហេតុការណ៍៖
https://t.me/+KgSNWoSdOsgyODdl
/Tiktok-ព៍ត៏មានទាន់ហេតុការណ៍៖
https://www.tiktok.com/@kpost.news?_t=ZS-8ufhVck58Vj&_r=1